بطنك بعد الولادة: مو بس انفصال عضلي 🌸
جتني مراجعة بعد ١٠ شهور من الولادة. تحسّن بروز بطنها وشكله، وهي مقتنعة إن السبب كله “انفصال العضلات”، وكل تركيزها عليه.
الانفصال العضلي سبب حقيقي ومهم وسهل لانه بسبب الضعف العضلي ، وأشتغل عليه كثير. بس اللي حبيت أوضحه لها ولك: شكل بطنك بعد الولادة نتيجة عوامل كثيرة تتداخل مع بعض، وكل عامل منها له سرعته. وهذي أهمها:
١. تجمّع الدهون، خصوصاً حول البطن
دراسة لقت إن وزن الامهات ينزل حوالي ٥ كجم، بس هذا النزول كان من السوائل والماء. أما كتلة الدهون فزادت، والدهون الحشوية (اللي حول الأعضاء ببطنك) زادت بنسبة كبيرة. يعني الميزان نزل، بس تركيب الجسم تغيّر ومنطقة البطن بالذات هي اللي تخزّن.
والهرمونات تساهم: خلال الرضاعة ترتفع هرمونات مثل البرولاكتين اللي يشجع تخزين الدهون وحفظ الطاقة، وعند بعض الامهات تستمر مقاومة الإنسولين. وهذا ما يعني إنك “ما تقدرين”، يعني بس إن جسمك يشتغل ببيئة هرمونية مختلفة.
٢. الانتفاخ وتغيّر بكتيريا الأمعاء
الأمعاء فيها ملايين البكتيريا اللي تأثر على الهضم والمناعة والتمثيل الغذائي، وبعد الولادة تتغير مع الأكل، والتوتر، وقلة النوم، والمكمّلات، وطريقة الولادة. مراجعة منهجية لـ ٢٧ دراسة لقت إن مقاييس الجسم مثل محيط الخصر ونسبة الخصر للورك مرتبطة بتغيّرات في ميكروبيوم الأمعاء بعد الولادة. ودراسة على ١٠٥ أم لقت إن اللي زاد وزنهن بعد الولادة قلّ عندهم تنوع بكتيريا الأمعاء، بينما اللي نقص وزنهن ما تغير عندهم شي.
وهذا ينعكس على الانتفاخ والغازات اللي تخلي بطنك يبان أكبر وأثقل. وبعدها الدهون والانتفاخ ممكن يغذون بعض: الدهون تأثر على الأمعاء، والأمعاء المتغيرة تأثر على التخزين، وكذا تصير دائرة.
أحب أكون صريحة: هالمجال لسا جديد، والدراسات تبيّن ارتباط مو سبب مباشر، وما نعرف بالضبط أي واحد يسبق الثاني. فما أقول لك “عدّلي بكتيريتك وبطنك بيتسطح”، أقول إنها جزء من الصورة ولازم ما نتجاهله.
٣. ضعف العضلات العميقة والانفصال
وبعد ما الدهون تتجمع والبطن ينتفخ، تجي العضلات: حمل ٩ شهور يمدد عضلات البطن، وبعد الولادة تحتاج وقت ومجهود موجّه للعضله عشان ترجع تشتغل بكفاءة. لو العضلات العميقة (العضلة المستعرضة، وقاع الحوض، والحجاب الحاجز) ضعيفة أو ما تتناسق مع النفَس، البطن ما يتماسك مهما كان وزنك. وهذا يشمل الانفصال العضلي، بس ما يقف عنده: ضعف العضلات يزيد بروز البطن، والانتفاخ والدهون يزيدون الضغط على جدار البطن الضعيف.
الرسالة اللي أبيها توصل
لما العوامل تكون كثيرة وتتداخل، الحل مو تمرين واحد ولا سبب واحد. الحل يحتاج فهم لجسمك، ووقت، واستمرارية:
فهم: تقييم من مختصة يوضح وش اللي يأثر على بطنك أنتِ بالذات: العضلات؟ الأمعاء؟ العادات؟ الاثنين؟
وقت: جسمك احتاج ٩ شهور يتغيّر بالحمل، فطبيعي يحتاج وقت مو قليل يرجع.
استمرارية: خطوات بسيطة ومنتظمة (تنفس، تفعيل العضلات العميقة، حركة يومية، أكل يريّح أمعائك، نوم) أفضل من شغل قوي لأسبوعين وبعدها توقف.
وعادي لو بطنك رجع بشكل مختلف. المهم إنك تمشين خطوة بخطوة، وتعرفين نفسك أكثر. 🌱
هذي المدونة معلومات عامة وما تغني عن تقييم مختصة.
عن الكاتبة
