لما مقدم الرعاية ما يسمعك… مين بيسمعك؟ 🌸

جتني مراجعة ببداية الأربعينات، سوّت عملية إزالة رحم، وعشانها صغيرة بالعمر، أبقوا لها المبايض. بالفحص سألتها عن التعب، النوم، التقلبات المزاجية، وتقليل الرغبة الجنسية — وكانت تعاني من كل هذا.

قالت لي: “أنا أشتكي من كل اللي قلتيه، وكل ما أروح لدكتور الجراحة، النساء، أو الغدد، يقولون لي تحاليلك كلها سليمة. صار صديقي شات جي بي تي، وهو يطبب علي، يقول لي: معليش، توك مسوية العملية.”

كانت كأنها غرقانة، وكأنها وصلت للنجاة وهي تحكي لي.

هالمراجعة ذكرتني بنفسي، وبكثير غيري: بسبب عدم التواصل العميق مع اللي نحتاجه — سواء طبيب أو غيره — نروح لشات جي بي تي، عشان ببساطة يسمعنا.💌

أول شي: أعراضها حقيقية، وتحاليلها ممكن تكون سليمة برضو

حتى لو المبايض بقيت، عملية إزالة الرحم ممكن تأثر على تدفق الدم لها. دراسات وأبحاث وضحت إن العملية ممكن تقلل تدفق الدم للمبايض بنسبة تتراوح بين ٥٠-٧٠٪، وهذا يأثر مؤقتاً على إفراز الهرمونات،

وممكن يرفع مستوى هرمون FSH،

ويسرّع دخول سن اليأس بعدة سنوات عند بعض النساء. يعني التعب، تقلب المزاج، وقلة الرغبة اللي تحس فيها مراجعتي، لها تفسير هرموني حقيقي حتى لو التحاليل العامة طلعت “سليمة”، لأن التحاليل ما تقيس كل شي، وخصوصاً وقت العملية والفترة اللي بعدها التي يحتاجها الجسم يستقر فيها.

ثاني شي: الاستماع نفسه جزء من العلاج

أبحاث في التواصل الطبي توضح إن المراجعة اللي تحس إن طبيبها يسمعها فعلاً، نسبة التزامها بالعلاج توصل ٧٠٪، مقابل ٥٠٪ بس لما تحس إن التواصل ضعيف. يعني الاستماع مو تفصيل جانبي أو “لطف زيادة”، هو جزء أساسي من نجاح العلاج نفسه.

ثالث شي: لما ما نلقى من يسمعنا، نروح لمن يسمعنا

بحوث جديدة توضح إن تقريباً ٣٠٪ من البالغين صارو يستخدمون تطبيقات الذكاء الاصطناعي شهرياً للاستفسار عن معلومات صحية!، وهالنسبة تضاعفت خلال سنتين بس.

والسبب الأكبر: إحساس الناس إنهم “مو مسموعين” من الجهة الطبية. الذكاء الاصطناعي ما يطبب فعلياً، بس هو يسمع بدون ما يقاطع أو يستعجل، وهذا وحده كافٍ يخلي ناس كثير يفضلونه.🫂

الرسالة اللي أبيها توصل

إذا حسيتِ إن تحاليلك سليمة بس جسمك يقول لك شي مختلف، ثقي بإحساسك. التحاليل العامة ما تحكي كل عَرض، خصوصاً بعد عملية زي هذي. ودوري كمختصة أو أي مختص تتعاملين معه، مو بس أقول لك “كل شي طبيعي”، دوري إني أسمعك، وأشرح لك وش يصير بجسمك فعلاً. التواصل الفعّال مو رفاهية، هو جزء من علاجك. 🌱

عن الكاتبة

سفانة السعيد

أكثر من 10 سنوات من الخبرة في العلاج الطبيعي تخصص صحة المرأة، تكرّس سفانة جهودها لتقديم رعاية شاملة للنساء، شغوفة بتمكين النساء لتحسين صحتهن وعافيتهن في جميع مراحل الحياة، من الحمل وحتى ما بعد الولادة وما بعدها.يدمج نهج سفانة الشامل التقنيات المبنية على الأدلة مع الرعاية الشخصية، مع تركيز خاص على نمط الحياة وتغيير السلوك لتحقيق نتائج مستدامة.تضمن أيضاً حصول كل مراجعة على برنامج مخصص تماماً لتلبية احتياجاتها. هي تخلق بيئة داعمة وتعليمية، مما يعزز الثقة ويمكّن النساء من استعادة قوتهن وحيويتهن الجسدية. تؤمن سفانة بأن كل امرأة تستحق أن تعيش حياة كاملة وصحية، خالية من الألم والقيود.